Amaravati : ఏపీలో కూటమి ప్రభుత్వం ఏర్పడిన తర్వాత అమరావతి కేంద్రంగా కార్యకలాపాలు స్పీడందుకున్నాయి. తాజాగా అమరావతిలో ప్రభుత్వ కాంప్లెక్స్ భవనాలను నోటిఫై చేస్తూ ప్రభుత్వం గెజిట్ నోటిఫికేషన్ జారీ చేసింది. అమరావతి మాస్టర్ ప్లాన్ ప్రకారం రాజధానిలో ప్రభుత్వ కాంప్లెక్స్ భవనాలు నిర్మించనున్నారు. ప్రభుత్వ భవనాల నిర్మాణాలకు సీఆర్డీఏ 1575 ఎకరాల ప్రాంతాన్ని నోటిఫై చేసింది. సీఆర్డీఏ చట్టం సెక్షన్ 39 ప్రకారం జోనింగ్ నిబంధనల ప్రకారం నోటిఫై చేసి బహిరంగ ప్రకటన జారీ చేసింది. ప్రభుత్వ భవనాల కోసం రాయపూడి, నేలపాడు, లింగాయపాలెం, శాఖమూరు, కొండమరాజుపాలెం గ్రామాల్లో ఉన్న ప్రాంతాన్ని నోటిఫై చేస్తూ సీఆర్డీఏ కమిషనర్ భాస్కర్ ఉత్తర్వులు జారీ చేశారు.
