గతేడాది ‘ఒకే ఒక జీవితం’ చిత్రంతో ఆకట్టుకున్న టాలెంటెడ్ హీరో శర్వానంద్ ప్రస్తుతం శ్రీరామ్ ఆదిత్య దర్శకత్వంలో ఓ సినిమా చేస్తున్నాడు. దీని తర్వాత తను చేయబోయే చిత్రానికి తాజాగా శర్వానంద్ గ్రీన్ సిగ్నల్ ఇచ్చినట్లు తెలుస్తోంది. ఈ సినిమాకి ‘సామజవరగమన’ ఫేమ్ రామ్ అబ్బరాజు దర్శకత్వం వహించనున్నట్లు సమాచారం.
ఈ ఏడాది జూన్ లో ‘సామజవరగమన’ చిన్న సినిమాగా విడుదలై ఎంతటి విజయాన్ని సాధించిందో తెలిసిందే. ఈ కామెడీ ఫిల్మ్ తో దర్శకుడు రామ్ అబ్బరాజు అందరి దృష్టిని ఆకర్షించాడు. దీంతో అతని తదుపరి చిత్రం ఏ హీరోతో అనే ఆసక్తి అందరిలో నెలకొంది. రామ్ అబ్బరాజు తన తదుపరి సినిమాని నాగ చైతన్యతో చేయనున్నాడని ఆ మధ్య వార్తలు వినిపించాయి. ఈ కథ విడాకుల నేపథ్యంలో ఉంటుందని కూడా ప్రచారం జరిగింది. అయితే కారణమేంటో తెలీదు కానీ.. ఇప్పుడు ఈ కథ శర్వానంద్ దగ్గరికి వెళ్ళిందట. రామ్ అబ్బరాజు చెప్పిన కథ నచ్చడంతో శర్వానంద్ వెంటనే ఓకే చెప్పినట్లు వినికిడి. మైత్రి మూవీ మేకర్స్ నిర్మించనున్న ఈ మూవీ అధికారిక ప్రకటన త్వరలోనే రానుందని అంటున్నారు.
