ఈ ఏడాది సంక్రాంతికి చిన్న సినిమాగా విడుదలై, స్టార్ హీరోల సినిమాల రేంజ్ లో పాన్ ఇండియా వైడ్ గా సౌండ్ చేసిన చిత్రం ‘హనుమాన్’. తేజ సజ్జ హీరోగా ప్రశాంత్ వర్మ దర్శకత్వంలో రూపొందిన ఈ సూపర్ హీరో మూవీ జనవరి 12న విడుదలై.. వరల్డ్ వైడ్ గా ఏకంగా రూ.300 కోట్లకు పైగా గ్రాస్ రాబట్టి, టాలీవుడ్ టాప్ గ్రాసర్స్ లో ఒకటిగా నిలిచింది. అంతలా థియేటర్లలో సత్తా చాటిన ఈ చిత్రం.. త్వరలో ఓటీటీ అలరించడానికి సిద్ధమవుతోంది.
‘హనుమాన్’ మూవీ ఓటీటీ స్ట్రీమింగ్ రైట్స్ ని జీ5 సొంతం చేసుకుంది. నిజానికి మార్చి 8 నుంచి జీ5 లో ఈ సినిమా స్ట్రీమింగ్ కానుందని న్యూస్ వినిపించింది. దీంతో ప్రేక్షకులు ఎంతగానో ఎదురుచూశారు. కానీ మార్చి 8న ఈ సినిమా ఓటీటీలోకి అడుగుపెట్టలేదు. దీంతో అందరూ నిరాశచెందారు. అయితే అతి త్వరలోనే ఈ చిత్రం ఓటీటీలో అందుబాటులోకి రానుందని తెలుస్తోంది. తెలుగుతో పాటు ఇతర భాషల్లో కూడా మార్చి 16 నుంచి జీ5 లో స్ట్రీమింగ్ కానుందని సమాచారం.
థియేటర్లలో విడుదలైన రెండు నెలల తర్వాతే హనుమాన్ మూవీ ఓటీటీలోకి వస్తుందని.. ప్రమోషన్స్ సమయంలో చిత్ర బృందం తెలిపింది. ఆ మాట ప్రకారమే మార్చి 8న ఓటీటీలో రిలీజ్ చేయకుండా.. మార్చి 16న విడుదల చేయాలని నిర్ణయించినట్లు టాక్.
ప్రైమ్‌షో ఎంటర్‌టైన్‌మెంట్ బ్యానర్ పై నిరంజన్ రెడ్డి నిర్మించిన ఈ సినిమాలో అమృత అయ్యర్, వరలక్ష్మి శరత్‌కుమార్, సముద్రఖని, వినయ్ రాయ్, వెన్నెల కిషోర్ తదితరులు నటించారు. గౌరహరి, అనుదీప్ దేవ్ సంగీతం అందించిన ఈ చిత్రానికి సినిమాటోగ్రాఫర్ గా దాశరధి శివేంద్ర, ఎడిటర్ గా సాయి బాబు వ్యవహరించారు.
