<div>ప్రపంచకప్‌లో దక్షిణాఫ్రికా విధ్వంసం కొనసాగుతోంది. మొదట భారీ లక్ష్యాన్ని నిర్దేశించడం… తర్వాత ప్రత్యర్థిని స్వల్ప స్కోరుకే కూల్చేసి ఘన విజయం సాధించడం ప్రొటీస్‌కు అలవాటుగా మారింది. మరోసారి అదే సాంప్రదాయాన్ని కొనసాగించిన దక్షిణాఫ్రికా… బంగ్లాదేశ్‌పై ఘన విజయం సాధించింది. ఇప్పటివరకూ ప్రొటీస్‌ జట్టు గెలిచిన నాలుగు మ్యాచుల్లోనూ ప్రత్యర్థి జట్లపై వందకుపైగా పరుగుల తేడాతో గెలవడం విశేషం. ఇక ఈ మ్యాచ్‌లో తొలుత బ్యాటింగ్‌ చేసిన సఫారీ జట్టు… ఓపెనర్‌ క్వింటన్‌ డికాక్‌ భారీ శతకం, క్లాసెన్‌ విధ్వంసంతో నిర్ణీత 50 ఓవర్లలో అయిదు వికెట్లు కోల్పోయి 382 పరుగుల భారీ స్కోరు చేసింది. దక్షిణాఫ్రికా ఈ మ్యాచ్‌లో 19 సిక్సర్లు బాదడం విశేషం. అనంతరం 383 పరుగుల భారీ లక్ష్యాన్ని ఛేదించేందుకు బరిలోకి దిగిన బంగ్లాదేశ్‌కు ప్రొటీస్‌ బౌలర్లు చుక్కలు చూపించారు. దక్షిణాఫ్రికా బౌలర్ల ధాటికి 46. 4 ఓవర్లలో 233 పరుగులకే బంగ్లా కుప్పకూలింది. దీంతో 149 పరుగుల తేడాతో సఫారీ జట్టు మరో భారీ విజయాన్ని తన ఖాతాలో వేసుకుంది. </div>
<div> </div>
<div><strong>ఆరంభంలో ఆచితూచి…</strong></div>
<div>ఈ మ్యాచ్‌లో టాస్‌ గెలిచిన దక్షిణాఫ్రికా… బంగ్లాదేశ్‌ బౌలర్లను ఊచకోత కోస్తూ మరోసారి భారీ స్కోరు నమోదు చేసింది. ఓపెనర్‌ క్వింటన్‌ డికాక్‌ మరోసారి భారీ శతకంతో చెలరేగగా, హెన్రిచ్‌ క్లాసెన్‌ భారీ షాట్లతో విధ్వంసం సృష్టించాడు. సఫారీ బ్యాటర్లు జోరుతో వాంఖడే మైదానం బౌండరీలతో హోరెత్తింది. దక్షిణాఫ్రికా బ్యాటర్లను ఆరంభంలో బంగ్లా బౌలర్లు సమర్థంగా అడ్డుకున్నారు. ఆరు ఓవర్లకు 33 పరుగులు చేసిన సమయంలో సఫారీకి తొలి దెబ్బ తగిలింది. 12 పరుగులు చేసిన హెన్డ్రిక్స్‌ను షోరిఫుల్ ఇస్లామ్‌ బౌల్డ్‌ చేయగా… ఒకే పరుగు చేసిన రస్సీ వాన్‌డెర్‌ డస్సెన్‌ను హసన్‌ మిరాజ్‌ వికెట్ల ముందు దొరకబు‌చ్చుకున్నాడు. దీంతో 8 ఓవర్లకో రెండు వికెట్ల నష్టానికి 36 పరుగులు చేసింది. చినుకు చినుకు గాలివానలా మారినట్లు మొదట ఓవర్‌కు ఆరు పరుగులు సాధిస్తూ ముందుకు సాగిన సఫారీ బ్యాటర్లు తర్వాత ఆకాశమే హద్దుగా చెలరేగారు. కానీ 69 బంతుల్లో 7 ఫోర్లతో 60 పరుగులు చేసిన మార్‌క్రమ్‌ను షకీబుల్‌ హసన్‌ అవుట్‌ చేశాడు. దీంతో 167 పరుగుల వద్ద సఫారీ జట్టు మూడు వికెట్లు కోల్పోయింది.</div>
<div> </div>
<div><strong>డికాక్‌, క్లాసెన్‌ విధ్వంసం</strong></div>
<div>ఈ ఆనందరం బంగ్లా బౌలర్లకు ఎక్కువసేపు నిలవలేదు. క్వింటన్‌ డికాక్‌…ఐడెన్‌ మార్క్రమ్‌ చెలరేగిపోయారు. ముఖ్యంగా క్వింటన్‌ డికాక్‌, హెన్రిచ్‌ క్లాసెన్‌… బంగ్లా బౌలర్లకు చుక్కలు చూపించారు. డికాక్ కేవలం 140 బంతుల్లో 15 ఫోర్లు, 7 సిక్సర్లతో 174 పరుగులు చేశాడు. హెన్రిచ్‌ క్లాసెన్‌ కేవలం 49 బంతుల్లో 2 ఫోర్లు, 8 సిక్సులతో 90 పరుగులు చేశాడు. ప్రారంభంలో కాస్త నెమ్మదిగా ఆడిన డికాక్‌… క్రీజులో కుదురుకున్నాక విధ్వంసం సృష్టించాడు. కేవలం బౌండరీల రూపంలోనే 92 పరుగులు వచ్చాయంటే డికాక్‌ విధ్వంసం ఎలా సాగిందో అర్థం చేసుకోవచ్చు. కచ్చితంగా డబుల్‌ సెంచరీ చేసేలా కనిపించిన డికాక్‌ ఆశలను హసన్‌ మహముద్‌ వమ్ము చేశాడు. డికాక్‌ను హసన్‌ మహముద్‌ అవుట్‌ చేయడంతో డికాక్‌ అద్భుత ఇన్నింగ్స్‌కు తెరపడింది. డికాక్‌ అద్భుత ఇన్నింగ్స్‌కు తెరపడినా హెన్రిచ్‌ క్లాసెన్‌ విధ్వంసం కొనసాగించాడు. దొరికిన బంతిని దొరికినట్లు స్టాండ్స్‌లోకి పంపాడు. కేవలం 49 బంతులే ఎదుర్కొన్న క్లాసెన్‌ 2 ఫోర్లు, 8 భారీ సిక్సర్లతో 90 పరుగులు చేశాడు. క్లాసెన్‌ అవుటైన తర్వాత విధ్వంసాన్ని కొనసాగించే పనిని మిల్లర్‌ తీసుకున్నాడు. 15 బంతుల్లోనే 1 ఫోరు, నాలుగు సిక్సులతో మిల్లర్‌ 34 పరుగులు చేశాడు. బ్యాటర్ల మెరుపులతో దక్షిణాఫ్రికా మరోసారి భారీ స్కోరు నమోదు చేసింది. నిర్ణీత 50 ఓవర్లలో అయిదు వికెట్లు కోల్పోయి 382 పరుగులు చేసింది. బంగ్లా బౌలర్లలో మహ్‌ముద్‌ రెండు, మిరాజ్‌, ఇస్లామ్‌, షకీబుల్‌ హసన్‌ ఒక్కో వికెట్‌ తీశారు.</div>
<div> </div>
<div><strong>మహ్మదుల్లా ఒంటరి పోరు</strong></div>
<div>అనంతరం 383 పరుగుల లక్ష్యంతో బరిలోకి దిగిన బంగ్లాదేశ్‌ బ్యాటర్లను.. ప్రొటీస్‌ బౌలర్లు నిలబడనీయలేదు. ఆరంభంలో పర్వాలేదనిపించినా బంగ్లా బ్యాటర్లు.. తర్వాత పెవిలీయన్‌కు క్యూ కట్టారు. 30 పరుగుల వద్ద తన్జీద్‌ హసన్‌, శాంటోను వరుస బంతుల్లో అవుట్‌ చేసిన జాన్సన్‌ బంగ్లా పతనాన్ని ప్రారంభించాడు. ఆ తర్వాత ఒక్క పరుగుకే సారధి షకీబుల్‌ హసన్‌ కూడా అవుటయ్యాడు. ముష్పికర్‌ రహీమ్‌, లిట్టన్‌ దాస్‌ కూడా పెవిలియన్‌ చేరడంతో బంగ్లా 15 ఓవర్లలో 58 పరుగులకే అయిదు వికెట్లు కోల్పోయి కష్టాల్లో పడింది. అనంతరం కాసేపు వికెట్ల పతనం ఆగినా జట్టు స్కోరు 81 పరుగులు చేరగానే హసన్‌ మిరాజ్‌ కూడా అవుటయ్యాడు. వరుసగా వికెట్లు పడుతున్నా మహ్మదుల్లా పోరాటం ఆపలేదు. ప్రొటీస్‌ బౌలర్లను సమర్ధంగా ఎదుర్కొన్న మహ్మదుల్లా 111 బంతుల్లో 11 ఫోర్లు 4 సిక్సులతో 111 పరుగులు చేశాడు. ఈ శతకంతో 150 అయినా దాటదనుకున్న బంగ్లా స్కోరు 233కు చేరింది. కానీ ఈ శతకం బంగ్లా ఓటమి తేడాను తగ్గించేందుకు మాత్రమే సరిపోయింది. 45.4 ఓవర్లో మహ్మదుల్లా అవుట్‌ కాగానే బంగ్లా పోరాటం ముగిసింది. 233కే బంగ్లా పరిమితం కావడంతో ప్రొటీస్‌ 149 పరుగుల తేడాతో మరో భారీ విజయాన్ని తన ఖాతాలో వేసుకుంది.</div>
Source link
SA vs BAN: దక్షిణాఫ్రికా తుపానులో బంగ్లా గల్లంతు, మహ్మదుల్లా ఒంటరి పోరాటం వృథా
