<p>వెస్టిండీస్‌ ప్రపంచ క్రికెట్‌లో పరిచయం అక్కర్లేని పేరు. 70వ దశకంలో క్రికెట్‌ను శాసించిన పేరది. అరివీర భయంకర బ్యాట్స్‌మెన్లకు వెన్నులో వణుకు పుట్టించిన బౌలర్లతో….. ఏ బౌలర్‌ను అయినా ఉతికి అరేసే బ్యాటర్లతో కరేబియన్‌ జట్టు ప్రత్యర్థులకు దడ పుట్టించేది. బరిలోకి దిగిందంటే విజయం ఆ జట్టు సొంతమయ్యేది. 1975లో ప్రారంభమైన తొలి ప్రపంచకప్‌ను… ఆ తర్వాత 1979 ప్రపంచకప్‌ను సునాయసంగా విండీస్‌ జట్టు సొంతం చేసుకుని తన ప్రాభవాన్ని ప్రపంచ క్రికెట్‌కు ఘనంగా చాటిచెప్పింది. క్లైవ్‌ లాయిడ్‌, గ్యారీ సోబర్స్‌, వివ్‌ రిచర్డ్స్‌, మాల్కం మార్షల్‌, గార్డెన్‌ గ్రినిడ్జ్‌, బ్రియాన్‌ లారా, శివనారాయణ్‌ చందర్‌పాల్‌.. ఇలా చెప్పుకుంటూ పోతే దిగ్గజ ఆటగాళ్లతో విండీస్‌ శత్రు దుర్భేద్యంగా ఉండేది. బంతితో ఆండీ రాబర్ట్స్, మైఖేల్ హోల్డింగ్, జోయెల్ గార్నర్, మాల్కం మార్షల్ నిప్పులు చెరిగితే… బ్యాట్‌తో సర్ గారీఫీల్డ్ సోబర్స్, సర్ వివియన్ రిచర్డ్స్, గోర్డాన్ గ్రీనిడ్జ్, బ్రియాన్ లారా పరుగుల వరద పారించేవారు. ఒంటిచేత్తో విజయాలు అందించే ఆటగాళ్లతో ప్రపంచ క్రికెట్‌లో విండీస్‌ ప్రస్థానం అప్రతిహాతంగా సాగింది. వెస్టిండీస్‌ 1975 నుంచి 1987 మధ్య ఆడిన వన్డే మ్యాచ్‌ల్లో 74 శాతం గెలిచిందంటే వారి విజయ ప్రస్థానం ఎలా సాగిందో తెలుసుకోవచ్చు.</p>
<p><strong>గత వైభవం:</strong><br />ఒకప్పుడు దిగ్గజ జట్లకు ముచ్చెమటలు పట్టించిన విండీస్‌ జట్టు.. ఇప్పుడు అఫ్గాన్‌, బంగ్లాదేశ్‌, నెదర్లాండ్స్‌, జింబాబ్వే వంటి జట్ల చేతుల్లోనూ పరాజయం పాలై ప్రపంచకప్‌ నుంచి నిష్క్రమించింది. క్రమక్రమంగా కరేబియన్‌ జట్టు ప్రభ మసక బారి ఇప్పుడు పాతాళానికి పడిపోయింది. ఒకప్పుడు క్రికెట్‌ అంటే విండీస్‌ జట్టే అన్నంతగా వెలిగిపోయిన కరేబియన్‌ జట్టు… ఇప్పుడు ప్రపంచకప్‌నకు కూడా అర్హత కూడా సాధించలేక చతికిలపడింది. 1975లో వన్డే ప్రపంచకప్‌ ప్రారంభమైన తర్వాత తొలిసారిగా వెస్టిండీస్‌ జట్టు లేకుండా ఈసారి ప్రపంచకప్‌ జరుగుతోంది. తొలి రెండు ప్రపంచకప్‌లను సునాయసంగా గెలుచుకున్న ఈ జట్టు… 48ఏళ్ల వరల్డ్‌ కప్‌ చరిత్రలో తొలిసారి అర్హత సాధించలేక పోయింది. ఇది వెస్టిండీస్‌ జట్టుకే కాదు… క్రికెట్‌ను అమితంగా ప్రేమించిన నాటి తరం క్రికెట్‌ ప్రేమికులకు కూడా తీరని బాధను మిగిల్చేదే.1980వ దశకం వరకు విండీస్‌ ప్రయాణం అప్రతిహాతంగా సాగింది. కరేబియన్‌ జట్టు బరిలోకి దిగుతుందంటేనే ప్రత్యర్థి జట్లు మానసికంగా ఓటమికి సిద్ధమైపోయేవి. కానీ విండీస్‌ పతనం ప్రారంభాన్ని భారత్‌ మొదలుపెట్టింది. హ్యాట్రిక్‌ ప్రపంచకప్‌ విజయాలు సాధించాలని గట్టి పట్టుదలగా ఉన్న క్లైవ్‌ లాయిడ్‌ బృందాన్ని… కపిల్‌దేవ్‌ సేన కోలుకోలేని దెబ్బకొట్టింది. ఇక ఆ తర్వాత వెస్టిండీస్‌ జట్టు ఏ ప్రపంచకప్‌లోనూ ఫైనల్‌కు కూడా చేరుకోలేక పోయింది. 1990వ దశకం వరకూ బలంగానే కనిపించిన విండీస్‌… తర్వాత పూర్తిగా పతనం కావడం ప్రారంభించింది. 1983 తర్వాత 1996 ప్రపంచకప్‌లో సెమీఫైనల్‌కు చేరడమే విండీస్‌కు అత్యుత్తమ ప్రదర్శన. </p>
<p><strong>వరుస రిటైర్మెంట్ లతో డీలా: </strong></p>
<p>1990వ దశకంలో బ్రియాన్‌ లారా, శివనారాయణ్‌ చందర్‌పాల్‌, క్రిస్‌ గేల్‌, శర్వాన్‌, బ్రావో సహా ఎంతోమంది ప్రతిభ కలిగిన ఆటగాళ్లు వచ్చినా గతంలో ఉన్నంత వైభవం విండీస్‌కు రాలేదు. లారా విండీస్‌ మరీ పాతాళానికి పడిపోకుండా ఆ దశకంలో అడ్డుపడ్డాడు . కానీ దిగ్గజ ఆటగాళ్ల వరుస రిటైర్మెంట్లతో విండీస్‌ బలహీనపడిపోయింది. దిగ్గజ ఆటగాళ్ల స్థానాన్ని భర్తీ చేసే ఆటగాళ్లే కరేబియన్‌ జట్టులోకి రాకపోవడంతో ఏ దశలోనూ విండీస్‌ జట్టు తేలుకోలేకపోయింది. 80వ దశకంలో విండీస్‌ జట్టులో తొమ్మది మంది ఫాస్ట్‌ బౌలర్లు ఉండేవారంటే వారి బౌలింగ్ విభాగం ఎంత పటిష్టంగా ఉండేదో అర్థం చేసుకోవచ్చు. 150 కిలోమీటర్ల వేగంతో విండీస్ బౌలింగ్‌ విభాగం… పిచ్‌పై నిప్పులు చెరిగేది. కానీ ఇప్పుడు కరేబియన్‌ జట్టులో కనీసం ముగ్గురు నాణ్యమైన బౌలర్లు లేరంటే ఆ జట్టు పరిస్థితిని అర్థం చేసుకోవచ్చు. </p>
<p>2012, 2016లో రెండు టీ 20 ప్రపంచ కప్ టైటిళ్లను విండీస్‌ గెలుచుకున్నా.. అది ఆ ఫార్మాట్‌కే పరిమితమైపోయింది. అదే ఊపును కరేబియన్‌ జట్టు వన్డేల్లో కొనసాగించలేక పోయింది. గత ఏడాది నుంచి మూడు ఫార్మట్లలోనూ విండీస్‌ పూర్తిగా పాతాళానికి పడిపోయింది. గత ఏడాది టీ ట్వంటీ వరల్డ్‌ కప్‌లో విండీస్‌ గ్రూప్‌ దశలోనే నిష్క్రమించి ఆ దేశ క్రికెట్‌ ప్రేమికులను విషాదంలో ముంచేసింది. ఇంతకుముందు వెస్టిండీస్ ఓటమి చాలా బాధించేది.. కానీ ఇప్పుడు అది మాకు అలవాటైందని ఆ దేశ దిగ్గజ ఆటగాడు గార్డాన్ గ్రీనిడ్జ్ వ్యాఖ్యానించడం కరేబియన్‌ జట్టు పతనం ఎలా సాగుతుందో చెప్పేందుకు నిదర్శనం.<br /> </p>
<p><strong>చూపంతా లీగ్ ల వైపే:</strong></p>
<p>విండీస్‌లో ఇప్పటికీ స్టార్‌ ఆటగాళ్లు లేక కాదు. ఉన్నా వారు జాతీయ జట్టు కంటే లీగ్‌లకే ఎక్కువ ప్రాధాన్యం ఇస్తారనే ప్రచారం ఉంది. గతేడాది ఐపీఎల్ వేలంలో నికోలస్ పూరన్ రూ.16 కోట్లకు అమ్ముడుపోయాడంటేనే అర్థం చేసుకోవచ్చు విండీస్‌ జట్టులో ఆటగాళ్లకు ఉన్న డిమాండ్‌. కానీ ప్రపంచవ్యాప్తంగా పుట్టగొడుగుల్లా పుట్టుకొస్తున్న టీ 20 లీగ్‌లు.. విండీస్‌ క్రికెట్‌ను పూర్తిగా నాశనం చేసిందనే ఆరోపణలు కూడా ఉన్నాయి. వెస్టిండీస్ క్రికెట్‌ బోర్టు ఆటగాళ్లకు మౌలిక సదుపాయాలు కూడా కల్పించలేని స్థితిలో ఉండడంతో కరేబియన్‌ క్రికెటర్లు లీగ్‌ బాట పట్టాల్సి వచ్చింది. "భారత అగ్రశ్రేణి స్టార్లు సంవత్సరానికి సుమారు రూ. 7 కోట్లు సంపాదిస్తే, వెస్టిండీస్ క్రికెటర్లు సెంట్రల్ కాంట్రాక్ట్‌ల ద్వారా కేవలం రూ. 1.2 కోట్లు మాత్రమే పొందుతున్నారు. క్రికెట్‌ను ప్రేమగా ఆడే రోజులు పోయాయి. ఎందుకంటే ప్రేమతో మీరు కిరాణ సరుకులు కూడా కొనలేరు" అని విండీస్‌ మాజీ కెప్టెన్‌ డారెన్‌ సామీ చేసిన వ్యాఖ్యలు ఆ దేశ క్రికెట్‌ బోర్డు పరిస్థితికి అద్దం పడుతున్నాయి. 2014లో వెస్టిండీస్ క్రికెట్ బోర్డుకి, ఆటగాళ్లకు మధ్య జరిగిన వాగ్వాదం, మేనేజ్‌మెంట్‌తో చెల్లింపు వివాదం.. ఈ వివాదంతో భారత పర్యటనను విండీస్‌ జట్టు అర్ధాంతరంగా విడిచిపెట్టిపోవడం వంటి ఘటనలు కూడా కరేబియన్‌ జట్టును పతనం దిశగా నడిపించాయి. </p>
<p><br />కర్ణుడి చావుకు సవాలక్ష కారణాలన్నట్లు విండీస్‌ క్రికెట్‌ పతనానికి కూడా చాలా కారణాలు ఉన్నాయి. ప్రపంచకప్‌నకు దూరమై విండీస్‌ ఎంత బాధ అనుభవిస్తుందో తెలీదు కానీ ఒకప్పుడు కరేబియన్‌ జట్టు గురించి కథలుకథలుగా చెప్పుకునే నాటి తరం క్రికెట్ ప్రేమికులకు మాత్రం ప్రపంచకప్‌లో విండీస్‌ను చూడలేకపోవడం తీరని వేదనను మిగిలుస్తుంది.</p>
Source link
ICC ODI World Cup 2023: పతాకస్థాయి నుంచి పాతాళానికి
