పాపికొండల మధ్య గోదావరి నదీ ప్రవాహం ఆహ్లాదభరితంగా సాగుతుంది. సూర్యోదయం, సూర్యాస్తమయం సమయాల్లో పాపికొండల అందాలు వర్ణించలేనంత ముచ్చట గొలుపుతాయి. ఈ ప్రాంతంలో సాధారణంగా చెట్లు ఆకు రాల్చవు. ఇది అత్యంత ప్రశాంతమైన,సుందరమైన, రమణీయమైన, ఆహ్లాదకరమైన ప్రదేశంగా చెప్పుకోవచ్చు. ఇక్కడి కొండలు, జల పాతాలు, గ్రామీణ వాతావరణం కారణంగా ఈ ప్రాంతాన్ని ఆంధ్రా కాశ్మీరం అని కూడా పిలుస్తారు. ఈ కొండల్లో నెలవైన దట్టమైన అటవీ ప్రాంతంలో పెద్ద పులులు, చిరుత పులులు, నల్ల పులులు, అడవి దున్నలు జింకలు, దుప్పులు, నక్కలు, తోడేళ్ళు, కొండ చిలువలు, వివిధ రకాల కోతులు, ఎలుగు బంట్లు, ముళ్ళ పందులు, అడవి పందులు, వివిధ రకాల పక్షులు, విష కీటకాలు మొదలైన జంతుజాలం నివాసం ఉంటున్నాయి. అలాగే వేలాది రకాల ఔషధ వృక్షాలు, మొక్కలు సైతం ఉన్నాయి.
