షారూక్‌ ఖాన్‌, నయనతార జంటగా అట్లీ తెరకెక్కించిన బ్లాక్‌ బస్టర్‌ మూవీ ‘జవాన్‌’ బాక్సాఫీస్‌ని కొల్లగొడుతూ కొత్త రికార్డులు సృష్టిస్తున్న విషయం తెలిసిందే. ఈ సినిమా చేసిన అట్లీకి అన్నివర్గాల ప్రేక్షకుల నుంచి, చిత్ర పరిశ్రమ నుంచి ప్రశంసలు లభిస్తున్నాయి. ఇప్పటికే ఈ సినిమా 900 కోట్ల రూపాయల మార్క్‌ను చేరుకుంది. ఇదిలా ఉంటే దర్శకుడు అట్లీ కొన్ని విమర్శలను ఎదుర్కొంటున్నాడు.
ఈ సినిమాలో హీరోయిన్‌గా నటించిన నయనతార తన క్యారెక్టర్‌ విషయంలో అసంతృప్తిని వ్యక్తం చేస్తోందని కొన్ని వర్గాలను ఊటంకిస్తూ హిందుస్థాన్‌ టైమ్స్‌ ప్రచురించిన కథనంలో పేర్కొన్నారు. ఈ సినిమాలో తన క్యారెక్టర్‌ని కిల్‌ చేశారని, దీపిక క్యారెక్టర్‌ను బాగా హైలైట్‌ చేశారని ఆరోపించింది. వాస్తవానికి దీపిక ఈ సినిమాలో గెస్ట్‌గా నటించింది. అయితే ఇది షారూక్‌, దీపిక సినిమాలా ప్రజెంట్‌ చేశారంటూ అసంతృప్తి వ్యక్తం చేస్తోందని ఆ కథనంలో తెలిపారు. సౌత్‌లో సూపర్‌స్టార్‌గా రాణిస్తున్న నయనతార ‘జవాన్‌’ చిత్రంలో తన క్యారెక్టర్‌ ట్రీట్‌మెంట్‌ విషయంలో హ్యాపీగా లేదని ఆ వర్గాలు పేర్కొన్నాయి.
ఇక ‘జవాన్‌’ సినిమా ప్రమోషన్‌, సక్సెస్‌మీట్‌ వంటి ఈవెంట్స్‌కి నయనతార దూరంగా వుండడానికి కారణం ఏమిటి అని అడిగిన ప్రశ్నకు.. గతంలో జరిగిన ఈవెంట్లలో తనకు జరిగిన కొన్ని చేదు అనుభవాల కారణంగా ఈవెంట్లకు హాజరు కాలేదని ఆ వర్గాలు స్పష్టం చేశాయి.
